ແຜນພັດທະນາ ການຫັນເປັນດິຈິຕອນ ແຂວງສາລະວັນ ໄລຍະ 5 ປີ ຄັ້ງທີ I (2025-2030)

ເພື່ອເຮັດໃຫ້ ວິໄສທັດ ແລະ ຍຸດທະສາດ ທີ່ໄດ້ກ່າວມາຂ້າງເທິງ ໄດ້ຮັບການຈັດຕັ້ງປະຕິບັດໄດ້ຢ່າງເປັນຮູບປະທຳ ຈຶ່ງຈຳເປັນຕ້ອງໄດ້ມີແຜນພັດທະນາດ້ານຕ່າງໆ ເພື່ອເປັນບ່ອນອີງໃນການຜັນຂະຫຍາຍໃນຊຸມປີຕໍ່ໜ້າ ຈຶ່ງໄດ້ວາງຄາດໝາຍສູ້ຊົນຕົ້ນຕໍ ໃນ 5 ປີຕໍ່ໜ້າ ດັ່ງນີ້:

ສົ່ງເສີມໃຫ້ເກີດມີການຄ້າເອເລັກໂຕຣນິກ ເປັນຮູບປະທຳ ເຊິ່ງປະກອບດ້ວຍ ພລັດຟອມການຄ້າເອເລັກໂຕຣນິກການຊຳລະຜ່ານເອເລັກໂຕຣນິກ, ໂລຊິດສະຕິກ, ຜະລິດຕະພັນ, ສິນຄ້າ ແລະ ການບໍລິການ.
ສົ່ງເສີມຜູ້ປະກອບການທຸລະກິດພາຍໃນໃຫ້ມີຄວາມເຂັ້ມແຂງ ໂດຍສະເພາະແມ່ນຜູ້ປະກອບການຂະໜາດກາງ, ນ້ອຍ ແລະ ສະຕາດອັບ ໃຫ້ມີການນຳໃຊ້ເຕັກໂນໂລຊີດິຈີຕອນ ແລະ ການຄ້າເອເລັກໂຕຣນິກ.
ຊຸກຍູ້ໃຫ້ມີນໍາໃຊ້ລະບົບຫ້ອງການທັນໄໝຂອງພາກລັດ ເປັນຕົ້ນ ລະບົບຄຸ້ມຄອງເອກະສານເອເລັກໂຕຣນິກ, ການສື່ສານພາຍໃນອົງກອນພາກລັດ ໃຫ້ທຸກພະແນກການອ້ອມຂ້າງແຂວງ ແລະ ເມືອງ ທີ່ມີຄວາມພ້ອມ.
ຊຸກຍູ້ໃຫ້ມີການຫັນບໍລິການ ຂອງພາກລັດ ໃຫ້ເປັນຮູບແບບອອນລາຍ ແລະ ຜ່ານປະຕູດຽວ ຢູ່ຂັ້ນແຂວງ.
ສົ່ງເສີມລະບົບການເກັບລາຍຮັບ ແລະ ການຄຸ້ມຄອງລາຍຈ່າຍ ໂດຍຜ່ານການເງິນ-ການທະນາຄານ, ການຊຳລະເອເລັກໂຕຣນິກ ເປັນຕົ້ນ ຜ່ານລະບົບທະນາຄານເອເລັກໂຕຣນິກ, ລະບົບການເງິນເອເລັກໂຕຣນິກເທິງໂທລະສັບມືຖື (Mobile Money).
ສົ່ງເສີມ ຂະຫຍາຍໂຄງລ່າງພື້ນຖານເຕັກໂນໂລຊີດິຈີຕອນຄວາມໄວສູງ ໄປໃນເຂດຊົນນະບົດ ແລະ ເຂດຈຸດສຸມພັດທະນາ.
ການນຳໃຊ້ເຕັກໂນໂລຊີດິຈີຕອນ ໃຫ້ຮັບປະກັນວຽກງານ ປກຊ-ປກສ ແລະ ມີຄວາມປອດໄພໃນການບໍລິຫານວຽກງານລັດ, ການດໍາເນີນທຸລະກິດ ແລະ ການນໍາໃຊ້ໃນສັງຄົມ.

ເພື່ອເຮັດໃຫ້ຄາດໝາຍສູ້ຊົນຂ້າງເທິງສາມາດຈັດຕັ້ງປະຕິບັດໄດ້ຕາມຄາດໝາຍ, ໃນແຜນການຫັນເປັນດີຈີຕອນ ແຂວງສາລະວັນ 5 ປີ ຄັ້ງທີ I (2025 – 20230) ຈຶ່ງໄດ້ກຳນົດເອົາ 9 ແຜນງານ ແລະ ບັນດາໂຄງການຕິດພັນ ເພື່ອເປັນແນວທາງ ໃນການຄົ້ນຄ້ວາ, ປັບປຸງ ແລະ ເປັນແຜນງານລະອຽດຂອງຕົນ ມີດັ່ງນີ້:

1. ແຜນງານທີ 1: ສ້າງ ແລະ ປັບປຸງນະໂຍບາຍ ແລະ ນິຕິກໍາໃຕ້ກົດໝາຍ.

ເພື່ອໃຫ້ການຫັນເປັນດິຈີຕອນ ມີປະສິດທິພາບ ແລະ ໄດ້ຮັບໝາກຜົນອັນສູງສຸດ, ພ້ອມດຽວກັນນັ້ນ ເພື່ອສາມາດສະໜອງບໍລິການທາງໄອຊີທີ ທີ່ມີການຄຸ້ມຄອງຢ່າງຮັດກຸມ, ປົກປ້ອງສິດ ແລະ ຜົນປະໂຫຍດຂອງຜູ້ຊົມໃຊ້ຜູ້ໃຫ້ບໍລິການ, ລວມເຖິງພັກ-ລັດ ກໍ່ຄຶຜົນປະໂຫຍດຂອງປະເທດຊາດ ແມ່ນປາສະຈາກບໍ່ໄດ້ ແຜນງານການສ້າງ ແລະ ປັບປຸງນະໂຍບາຍ ແລະ ລະບຽບ ໃນຂະແໜງການຕ່າງໆ ທີ່ກ່ຽວຂ້ອງ. ສາມາດແບ່ງອອກໄດ້ຄຶດັ່ງນີ້:

ສ້າງ ແລະ ປັບປຸງລະບຽບ ໃຫ້ຮັດກຸມ, ພຽບພ້ອມ ແລະ ທັນການກັບການປ່ຽນແປງ ແຕ່ລະໄລຍະ, ແນ່ໃສ່ຮັບປະກັນການຄຸ້ມຄອງຜົນປະໂຫຍດຂອງພັກ-ລັດ, ປະໂຫຍດ ແລະ ສິດ ຂອງຜູ້ປະກອບການ ແລະ ຜູ້ຊົມໃຊ້ເປັນຕົ້ນ: ນິຕິກໍາກ່ຽວກັບໄອຊີທີ, ການຄ້າ ແລະ ການບໍລິການທາງເອເລັກໂຕນິກ, ການປົກປ້ອງ ທາງເອເລັກໂຕຣນິກ ແລະ ຊັບພະຍາກອນໄອຊີທີ.
ສ້າງນະໂຍບາຍ ເພື່ອຊຸກຍູ້ການນຳໃຊ້ທຸກບໍລິການ ການຫັນເປັນດິຈີຕອນ ເພື່ອໃຫ້ທຸກພາກສ່ວນຮ່ວມມືໃນຂະບວນການດັ່ງກ່າວນີ້ຢ່າງຟົດຟື້ນ ແລະ ເປັນຂະບວນການ. ນອກນັ້ນ ແມ່ນການສ້າງນະໂຍບາຍ ອໍານວຍຄວາມສະດວກໃຫ້ແກ່ພາກສ່ວນເອກະຊົນໃນການລົງທຶນໃສ່ວຽກງານໄອຊີທີຂອງຂະແໜງການຕ່າງໆ ມັນຈະຊ່ວຍໃນການກະຕຸ້ນການຫັນເປັນດິຈີຕອນ ເປັນວົງກ້າງ.